Bullİnq

Cəmiyyətin sosial-psixoloji problemlərindən biri də bullinqdir!   Bullinq insanların incidilməsinə səbəb olan ixtiyari və təkrar olaraq törədilmiş aqressiv davranışdır. Bullinqə məruz qalan şəxslər illər keçsə də,zamanında yaşadığı hadisəni unutmur və onun psixologiyasına ciddi təsir göstərir. Bullinqin bir çox növləri var:
Kiber, fiziki, şifahi, sosial, psixoloji.
Sosial - Şəxsin hansısa qrupdan kənarlaşdırılması, sinifdən təcrid esilməsi, ona qarşı qruplaşma yaratmaq bullinqin sosial növünə aiddir.
Kiber - Sosial şəbəkələr və mesajlar vasitəsi ilə insanları alçaltmaq, qorxutmaq, hesabların sındırılması kiber zorakılığa aid edilir. Qeyd edim ki, sosial media cəmiyyətimiz tərəfindən aktiv istifadə olunduğu üçün kiber zorakılıq daha çox artmaqdadır.
Fiziki - Fiziki bullinqə vurmaq, itələmək, qəsdən toxunmaq, tüpürmək, əşyaların oğurlanması və s. daxildir.
Şifahi - Qorxutmaq, sözlərlə alçaltmaq, adına ləkə yaxmaq şifahi bullinq sayılır.
Psixoloji - Təqib etmək, qərəzli baxışlar və başqa psixoloji zorakılıqlar bu növə daxildir.

Azərbaycanda və digər ölkələrdə baş vermiş intiharların səbəblərini araşdırdıqda bullinq və intihar arasında əlaqənin çoxluğu ortaya çıxır. Bütün səbəbləri nəzərdən keçirdikdən sonra belə nəticə əldə etmək olar ki, bullinq insanları öldürür. Bu ölümlərdə günahkar isə cəmiyyətimizin yanlış tərbiyə olunmuş şəxsləridir. Son zamanlar təhsil müəssisələrində bullinq geniş yayılmışdır. Ötən günlərdə yayılan videoda bullinqin növləri öz əksini tapmışdır. Belə ki, bu hadisələrə qarşı ciddi tədbirlərin görülməməsi bullinqin artmasına səbəb olur. Çəkinmədən, sərbəst şəkildə insanlara aqressiv davranışlar sərgiləyərək şərəf və ləyaqətlərinin alçaldılması eyni zamanda nifrət hisslərini düzgün olmayan davranış və sözlərlə əks etdirmək insana qarşı törədilmiş mənəvi cinayətdir. Ciddi tədbirlərin görülməsi mütləqdir. Bu hallar sağlam cəmiyyətin formalaşmasının qarşısını alır. Sağlam cəmiyyət parlaq gələcək deməkdir. Cəmiyyət bir şəxs kimi formalaşmaqda böyük rol oynayır. Bullinqlər davam edər və artarsa, düzgün cəmiyyətdən söz gedə bilməz. Bu, qlobal problemdir və həll olunmağa məhkumdur.