4 oktyabr – Tofiq Quliyevin Xatirə Günüdür

Bu gün Azərbaycanın görkəmli bəstəkarı, Xalq Artisti, Dövlət Mükafatı laureatı Tofiq Ələkbər oğlu Quliyevin (7 noyabr 1917 – 4 oktyabr 2000) anım günüdür.
XX əsr Azərbaycan musiqisinin inkişafında mühüm rol oynamış sənətkar  yüzlərlə mahnıları,  estrada və kino musiqiləri, həm də fortepiano əsərləri və operettaları ilə yaddaşlarda qalmaqdadır. Onun "Sənə də qalmaz", "Darıxma", "Coş dənizim", "Gəlinim", "Məhəbbət çırağı" ( "Qaynana" filmindən) kimi mahnıları Azərbaycan musiqi tarixinin Qızıl Fonduna daxil olub. O həmçinin Azərbaycan caz və estrada musiqisinin banilərindən biri hesab olunur.
Tofiq Quliyev yalnız bəstəkar kimi deyil, həm də görkəmli dirijor, pianoçu və musiqi-ictimai xadim kimi fəaliyyət göstərib.  Sənətkarın zəngin yaradıcılığı bu gün də ifaçılar tərəfindən sevə-sevə səsləndirilir, dinləyicilər tərəfindən böyük rəğbətlə qarşılanır.
Xatırladaq ki, bəstəkarın xatirəsi hər il ölkəmizdə və dünyada müxtəlif tədbirlər və konsert proqramları ilə yad edilir.
Tofiq Quliyev Azərbaycan musiqi irsində əbədiyaşar sənətkar kimi qalmaqda davam edir.