Bakı ilə Bratislava arasındakı strateji tərəfdaşlıq

Slovakiya Respublikasının Prezidenti Peter Pelleqrinin Azərbaycana rəsmi səfəri və iyulun 14-də Şuşada dövlət başçılarının verdiyi birgə bəyanatlar Bakı ilə Bratislava arasındakı strateji tərəfdaşlığın yeni reallıqlarını dünyaya nümayiş etdirdi. Bu mühüm görüş təkcə ikitərəfli əlaqələrin inkişafını sürətləndirmir, həm də qlobal geosiyasi dəyişikliklər fonunda Azərbaycanın Avropanın etibarlı siyasi və iqtisadi tərəfdaşı statusunu bir daha qətiləşdirir. Qədim Şuşa şəhərinin belə yüksək səviyyəli diplomatik dialoqlara ev sahibliyi etməsi Bakının regionda diktə etdiyi sülh gündəliyinin və ərazi bütövlüyümüzün beynəlxalq səviyyədə tam qəbul olunmasının növbəti əyani sübutudur. Prezident İlham Əliyevin bəyanatında yer alan əsas tezislər ölkəmizin yürütdüyü müstəqil xarici siyasət kursunun və milli maraqlara əsaslanan regional liderlik missiyasının məntiqi davamıdır. İki tərəf arasında müdafiə sənayesi, energetika və logistika sahələrində əldə olunan razılaşmalar Mərkəzi Avropa ölkələri ilə qurulan strateji körpülərin iqtisadi sütunlarını daha da möhkəmləndirir. Xüsusilə Azərbaycanın təbii qaz resurslarının Avropa bazarlarına diversifikasiyası kontekstində Slovakiyanın cəlb olunduğu layihələr qlobal enerji təhlükəsizliyinin təminində Bakının həlledici rolunu şərtləndirir. Eyni zamanda, azad edilmiş Qarabağ və Şərqi Zəngəzurun "Ağıllı şəhər" konsepsiyası ilə yenidən qurulması prosesində slovakiyalı investorların və şirkətlərin iştirak imkanları ikitərəfli əməkdaşlığa yeni innovativ çalarlar qazandırır. Dünyada beynəlxalq hüququn norma və prinsiplərinin sınağa çəkildiyi bir dövrdə bu miqyasda qurulan bərabərhüquqlu tərəfdaşlıq platformaları respublikamızın suverenliyinin qlobal müstəvidə güclənməsinə xidmət edir. Şuşadan ucalan bu rəsmi bəyanatlar gənc media mütəxəssisləri və fəal cəmiyyət üzvləri qarşısında dövlətimizin diplomatik uğurlarını intellektual müstəvidə təbliğ etmək məsuliyyəti qoyur. Bakı-Bratislava dialoqunun yeni strateji prinsiplərinə sadiqlik Azərbaycanın uzunmüddətli geostrateji suverenliyinin və Avrasiya coğrafiyasındakı milli maraqlarının ən güclü dayaqlarından biridir.
Aysu Qədirli
YAP Yasamal rayon təşkilatının fəal üzvü