“F-35” böhranı: Qırıcıların Türkiyəyə tədarükü ABŞ ilə münasibətlərdə dönüş nöqtəsi ola bilər - ŞƏRH

Türkiyənin xarici siyasət kursunda ən diqqətçəkən məqamlardan biri NATO üzrə müttəfiqi ABŞ ilə münasibətlərlə bağlıdır. Ankara və Vaşinqton bu gün təxminən mehriban düşmən kimidirlər. Türkiyə Alyans ölkəsi olmasına baxmayaraq, ayrı-ayrı regionlarda Ağ Evin siyasəti ilə razılaşmır, əksinə, lazım gələndə onu açıq şəkildə tənqid edir.

Eyni zamanda, tərəfləri yaxınlaşdıra bilən məqamlar da var. Bunlardan biri “F-35” qırıcılarının və “F-16”ların növbəti partiyasının Türkiyəyə tədarükü ilə bağlıdır. Vaşinqton bu prosesi mümkün qədər ləngitməyə çalışır. Bunun bir neçə səbəbi var. Birincisi, ABŞ qırıcıların tədarükünü əlində “kozır” kimi saxlamağa, bu məsələni siyasi alış-veriş predmetinə çevirməyə və mümkün qədər çox qazanclı çıxmağa çalışır. İkincisi, Ağ Ev Türkiyənin fərqli regionlarda, o cümlədən Yaxın Şərqdə, Balkan ölkələrində təsir gücünü artırmasından narahatdır.

Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi yanvarın 31-də jurnalistlərə açıqlamasında demişdi ki, ABŞ Türkiyə ilə onun “F-35” qırıcılarının istehsalı proqramına qayıtması imkanını müzakirə edir.